Մեթֆորմին-Դենկ 1000մգ N30 ցուցումներ

Ինսուլինը ենթաստամոքսային գեղձի կողմից արտադրվող հորմոն է, որի միջոցով արյան մեջ պարունակվող գլյուկոզան յուրացվում է օրգանիզմի բջիջների կողմից:

Օրգանիզմը գլյուկոզան օգտագործում է էներգիա ստանալու համար կամ պահպանում է այն՝ հետագայում օգտագործելու համար:

Շաքարային դիաբետի դեպքում ենթաստամոքսային գեղձը չի արտադրում բավարար քանակությամբ ինսուլին կամ օրգանիզմը չի կարողանում պատշաճ կերպով օգտագործել այն, ինչը հանգեցնում է արյան մեջ գլյուկոզայի մակարդակի բարձրացմանը: Մետֆորմինը նպաստում է արյան մեջ գլյուկոզայի մակարդակի նվազեցմանը մինչև հնարավորինս նորմալ ցուցանիշներ:

Մետֆորմինի երկարատև կիրառումը նպաստում է ավելորդ քաշ ունեցող պացիենտների մոտ շաքարային դիաբետի բարդությունների զարգացման ռիսկի նվազեցմանը: Մետֆորմինի կիրառումը նպաստում է նաև մարմնի քաշի կայունացմանը կամ չափավոր կորստին:

Մետֆորմինը ցուցված է 2-րդ տիպի (ոչ ինսուլինակախյալ) շաքարային դիաբետ ունեցող պացիենտների բուժման համար: Այն հատկապես ցուցված է ավելորդ քաշ ունեցող այն պացիենտների բուժման համար, որոնց մոտ արյան մեջ գլյուկոզայի պատշաճ մակարդակը չի կարգավորվում միայն սննդակարգին հետևելու և ֆիզիկական վարժությունների միջոցով:

Մեծահասակներին մետֆորմինը կարող է նշանակվել մոնոթերապիայի, ինչպես նաև` ներքին ընդունման այլ հակաշաքարախտային դեղերի կամ ինսուլինի հետ համակցված բուժման ձևով:

10 տարեկան և ավելի մեծ երեխաներին մետֆորմինը կարող է նշանակվել մոնոթերապիայի կամ ինսուլինի հետ համակցված բուժման ձևով:

Մի օգտագործեք Մետֆորմին դեղը, եթե

• ունեք ալերգիա (գերզգայնություն) մետֆորմինի հիդրոքլորիդի կամ դեղի օժանդակ նյութերից որևէ մեկի նկատմամբ (դրանք թվարկված են ստորև՝ «Ինչ է պարունակում դեղի փաթեթը և այլ տեղեկություն» բաժնում),
• ունեք լյարդային անբավարարություն,
• ունեք երիկամների ֆունկցիայի ծանր աստիճանի խանգարումներ,
• ունեք չվերահսկվող շաքարային դիաբետ, օրինակ՝ սուր գերշաքարարյունություն (արյան մեջ գլյուկոզայի բարձր մակարդակ), սրտխառնոց, փսխում, փորլուծություն, մարմնի քաշի կտրուկ կորուստ, լակտոացիդոզ (տե՛ս ստորև «Լակտոացիդոզի զարգացման ռիսկ» բաժինը) կամ կետոացիդոզ: Կետոացիդոզի դեպքում արյան մեջ կուտակվում են կետոնային մարմիններ, ինչը կարող է հանգեցնել դիաբետիկ նախակոմայի զարգացմանը: Կետոացիդոզի ախտանիշներն են` ցավը որովայնում, խոր և հաճախացած շնչառությունը, քնկոտությունը կամ ացետոնի բնորոշ հոտը բերանից,
• օրգանիզմը ջրազրկված է (դեհիդրատացիա), օրինակ՝ երկարատև ծանր փորլուծության կամ բազմակի փսխումների արդյունքում: Օրգանիզմի ջրազրկումը կարող է հանգեցնել երիկամային ֆունկցիայի խանգարմանը, ինչի արդյունքում կարող է զարգանալ լակտոացիդոզ (տե՛ս «Կիրառման հատուկ հրահանգներ և նախազգուշացումներ» բաժինը),
• առկա է վարակային ծանր հիվանդություն, օրինակ՝ թոքերի, բրոնխների կամ երիկամների վարակ: Ծանր վարակների դեպքում կարող է զարգանալ երիկամների ֆունկցիայի խանգարում, ինչի արդյունքում կարող է ի հայտ գալ լակտոացիդոզ (տե՛ս «Կիրառման հատուկ հրահանգներ և նախազգուշացումներ» բաժինը),
• ընդունում եք բուժում սրտային սուր անբավարարության համար կամ վերջերս ունեցել եք սրտի նոպաներ, առկա են արյան շրջանառության լուրջ խանգարումներ (օրինակ՝ շոկ) կամ շնչառության խանգարումներ: Նշված երևույթները կարող են հյուսվածքներում թթվածնային անբավարարություն առաջացնել, ինչի արդյունքում կարող է զարգանալ լակտոացիդոզ (տե՜ս «Կիրառման հատուկ հրահանգներ և նախազգուշացումներ» բաժինը),
• օգտագործում եք մեծ քանակությամբ ալկոհոլ:

Օգտագործման ցուցումներ և դեղաչափ 

Մետֆորմին դեղն անհրաժեշտ է օգտագործել բժշկի նշանակմանը համապատասխան: Եթե համոզված չեք, թե ինչպես պետք է դեղն ընդունել, դիմեք բժշկի կամ դեղագետի:

Մետֆորմին դեղի կիրառումը չի կարող փոխարինել առողջ ապրելակերպին հետևելուց ակնկալվող օգուտին: Հետևե´ք հատուկ սննդակարգի և կանոնավոր ֆիզիկական վարժությունների վերաբերյալ բժշկի խորհուրդներին:

10 տարեկան և ավելի մեծ երեխաներ և դեռահասներ

Տարիքային այս խմբի պացիենտների համար Մետֆորմին դեղի նախնական դեղաչափը 500 մգ կամ 850 մգ է, որն ընդունվում է օրական 1 անգամ: Առավելագույն օրական դեղաչափը 2000 մգ է, որը բաժանվում է 2-3 ընդունումների: Հիմք ընդունելով 10-ից մինչև 12 տարեկան երեխաների մոտ դեղի կիրառման սահմանափակ փորձը՝ խորհուրդ է տրվում տվյալ տարիքային խմբի պացիենտների բուժումն իրականացնել միայն բուժող բժշկի ցուցումներին համապատասխան:

Չափահասներ

Մետֆորմին դեղի նախնական դեղաչափը 500 մգ կամ 850 մգ է, որն ընդունվում է օրական 2-3 անգամ: Առավելագույն օրական դեղաչափը 3000 մգ է, որը բաժանվում է 3 ընդունումների:

Երիկամային ֆունկցիայի թուլացման դեպքում բուժող բժիշկը կարող է նշանակել ավելի ցածր դեղաչափ:

Եթե անհրաժեշտ է միաժամանակ ինսուլին ընդունել, ապա բժիշկը կտեղեկացնի, թե ինչ սխեմայով պետք է սկսել Մետֆորմին դեղի կիրառումը:

Մշտադիտարկում

• Բուժող բժիշկը պետք է իրականացնի արյան մեջ գլյուկոզայի մակարդակի կանոնավոր ստուգում և, ելնելով ստացված արդյունքներից, ճշգրտի Մետֆորմինի դեղաչափը: Անհրաժեշտ է պարբերաբար այցելել բժշկին: Սա հատկապես կարևոր է երեխաների, դեռահասների և տարեց պացիենտների համար:
• Մետֆորմինով բուժման ընթացքում՝ առնվազն տարին մեկ անգամ պետք է կատարել երիկամային ֆունկցիայի մանրակրկիտ հսկողություն: Եթե տարեց եք կամ առկա է երիկամային ֆունկցիայի խանգարում, ապա ստուգումները կարող են ավելի հաճախ լինել: