Զամբյուղը դատարկ է
Թոքերի քրոնիկ օբստրուկտիվ հիվանդություն
08 / 02 / 2022
Թոքերի քրոնիկ օբստրուկտիվ հիվանդությունը բորբոքային հիվանդություն է, որը դժվարացնում է թոքերից օդի դուրս գալը: Ախտանշաններն ներառում են դժվարացած շնչառություն, հազ, խորխարտադրություն և հևոց:
Հիվանդությունը հաճախ հետևանք է գրգռող գազերի կամ կոշտ մասնիկների (ծխախոտի ծուխ և այլն) երկարատև ազդեցության: Այս ախտաբանությամբ տառապողները ենթակա են սիրտ-անոթային հիվանդության, թոքերի քաղցկեղի և այլ հիվանդությունների զարգացման վտանգին:
Էմֆիզեման և քրոնիկ բրոնխիտը երկու առավել տարածված վիճակներ են, որոնք նպաստում են թոքերի քրոնիկ օբստրուկտիվ հիվանդության առաջացմանը:
- Քրոնիկ բրոնխիտ. բրոնխների լորձաթաղանթի բորբոքումն է, որը բնորոշվում է մշտական հազով և խորխարտադրությամբ:
- Էմֆիզեմա. թոքերի քրոնիկ հիվանդություն է, որի ժամանակ դիտվում է մանր բրոնխիոլների (բրոնխների ծայրային ճյուղավորումներ) լայնացում և ալվեոլների միջնապատերի քայքայում:
Պատճառները
Թոքերի քրոնիկ օբստրուկտիվ հիվանդության հիմնական պատճառը զարգացած երկրներում ծխախոտի օգտագործումն է: Զարգացող երկրներում հիվանդությունը հաճախ հանդիպում է այն մարդկանց մոտ, որոնք ենթարկվում են գազերի, վառելիքի ծխի ազդեցության՝ վատ օդափոխվող սենյակում:
Ախտանշանները
Թոքերի քրոնիկ օբստրուկտիվ հիվանդության ախտանշանները կարող են չարտահայտվել այնքան ժամանակ, քանի դեռ չի զարգացել թոքերի նշանակալի ախտահարում: Վիճակի ծանրության աստիճանը բարձրանում է ժամանակի ընթացքում, հատկապես, եթե թոքերի վրա վնասակար ազդեցությունը շարունակվում է:
Քրոնիկ բրոնխիտի հիմնական ախտանշանը հազն է, խորխարտադրությունը` ոչ պակաս 3 ամիս տևողությամբ, 2 տարի անընդմեջ:
Կարող են լինել նաև այլ ախտանշաններ.
- հևոց, հատկապես ֆիզիկական ծանրաբեռնվածության ժամանակ,
- խզզոց` շնչելիս,
- կրծքավանդակի ճնշման զգացողություն,
- քրոնիկ հազ` խորխարտադրությամբ, թափանցիկ, դեղին կամ կանաչավուն,
- շրթունքների կամ եղունգների կապտություն (ցիանոզ),
- հաճախակի շնչառական հիվանդություններ,
- էներգիայի պակաս,
- քաշի անկում (ավելի ուշ շրջաններում),
- այտուց` ձեռքերի ափերում, ներբաններում և ոտքերում:
Բարդությունները
Թոքերի քրոնիկ օբստրուկտիվ հիվանդությունը կարող է բազմաթիվ բարդություններ առաջացնել:
- Շնչառական հիվանդություններ. հիվանդները հաճախ են մրսածական հիվանդություններ ունենում: Գրիպը և թոքաբորբը կարող են վատացնել շնչառությունը և հետագայում առաջացնել թոքային հյուսվածքի վնասում:
- Սրտի հետ կապված խնդիրներ. դեռևս ոչ այնքան հասկանալի պատճառներով թոքերի քրոնիկ օբստրուկտիվ հիվանդությունը կարող է մեծացնել սրտային հիվանդությունների վտանգը: Ծխախոտից հրաժարվելը վտանգը կարող է նվազեցնել:
- Թոքերի քաղցկեղ. այս հիվանդներն առավել նախատրամադրված են թոքերի քաղցկեղի զարգացմանը:
- Բարձր զարկերակային ճնշում` թոքային զարկերակներում. հիվանդությունը կարող է առաջացնել ճնշում այն զարկերակներում, որոնք արյուն են մատակարարում թոքային հյուսվածքին:
Կանխարգելումը
Քանի որ հիվանդության դեպքերի մեծ մասը կապված է ծխելու հետ, ամենակարևոր կանխարգելումը ծխելուց հրաժարվելն է:
Վնասակար քիմիական գազերի, գոլորշու ազդեցության դեպքում անհրաժեշտ է առավելագույն քչացնել դրանց հետ առնչությունը, կամ օգտագործել հատուկ պաշտպանիչ միջոցներ (հակագազ, դիմակ):
.