Կայքը գտնվում է պատրաստման փուլում

Կատալոգ
Զամբյուղ

Զամբյուղը դատարկ է

Խռմփոցը՝ որպես առողջական և սոցիալական խնդիր.

11 / 12 / 2021

Այն երկրներում, որտեղ քնի բժշկությունն ավելի զարգացած է, միանշանակ նկատվում է ավելի մեծ ուշադրություն այս երևույթին թե՛ ընտանիքի անդամների, թե՛ ընդհանուր պրոֆիլի բժիշկների, թե՛ լրատվամիջոցների կողմից՝ լուսաբանելու և ներկայացնելու համար խռմփոցի խիստ բացասական ազդեցությունը մարդու ընդհանուր առողջական վիճակի վրա:
Արդյունքում, հայտնաբերելիությունն անհամեմատ ավելի բարձր մակարդակ ունի:
Արտասահմանյան երկրներում խնդրին մեծ ուշադրություն է դարձվում նաև պայմանավորված այն փաստով, որ ամուսնական զույգերը խիստ կարևորում են իրենց անձնական կոմֆորտը և փոքր խնդրի, անհանգստության դեպքում անգամ կողակցին հորդորում են այցելել բժշկի:
Իսկ քիչ չեն այն դեպքերը, երբ խռմփոցն այնքան է լարում և փչացնում հարաբերությունները, երբ ամուսնական զույգը հանգում է նույնիսկ ամուսնալուծության:

Տեսակները
Գոյություն ունի սովորական խռմփոց և խռմփոց, որը բարդացած է քնի ընթացքում շնչառական այլ խնդիրներով՝ քնի ապնոէով (շնչադադար) և այլն:
Խռմփացնողների շուրջ 70%-ի շրջանում հանդիպում է նաև քնի շնչադադար: 

Հետևանքները

Քնի ընթացքում խռմփացնող մարդու մոտ անհամեմատ ավելի մեծ է սիրտ-անոթային և ուղեղանոթային համակարգի հիվանդություններ ձեռք բերելու, զարկերակային գերճնշման, շաքարային դիաբետի հավանականությունը: Նաև քիչ չեն հիշողության վատացման, հոգեհուզական ոլորտի և սեռական բնույթի խնդիրները։
Ի՞նչ կարող են անել ընտանիքի անդամները
Խռմփոցը պետք է ահազանգ լինի խռմփացնող մարդու ընտանիքի անդամների համար, այլ ոչ թե սովորական երևույթ: Հաշվի առնելով, որ սա այն դեպքերից է, երբ բժիշկն ինֆորմացիա հավաքում է կողքի աղբյուրներից, պետք է ասել, որ կողակցի կամ ընտանիքի անդամների դերն այս գործում շատ կարևոր է:

Քնելու դիրքը
Խռմփոցի առաջացմանը կամ ուժգնացմանը նպաստում է մեջքային դիրքը, ալկոհոլային ըմելիքների օգտագործումը… Այն մարդիկ, ովքեր խռմփացնում են միայն նշված դեպքերում, գուցե և կարող են չանհանգստանալ, սակայն մարդկանց գերակշիռ մասը՝ անկախ այս գործոններից, յուրաքանչյուր դիրքում քնած ժամանակ խռմփացնում է:
Խռմփոցները տարբերակվում են նաև ըստ ձայնի ուժգնության:

Ինչու՞ են մարդիկ խռմփացնում, և որո՞նք են ռիսկի գործոնները
Խռմփոցի պատճառ, մեծամասամբ հանդիսանում է բկանցքի հատվածի փափուկ հյուսվածքների թուլությունը՝ քնի ժամանակ: Եթե անձի մոտ առկա է ճարպակալում, նույնիսկ ավելորդ քաշ, որոշակի հիվանդագին վիճակներ (կանանց մոտ օրինակ՝ հիպոթիրիոզ), շաքարային դիաբետ, անատոմիական առանձնահատկություններ՝ կախ քիմք, երկար լեզվակ, մեծ նշիկներ, ժառանգական գործոն, սրանք ավելի են մեծացնում խռմփացնելու հավանականությունը:Ինչու՞ է առաջանում խռմփոցի ձայնը
Թուլացած հյուսվածքների՝ կախված վիճակում օդի մուտք ու ելքից առաջացող տատանումներն են հենց առաջացնում խռմփոցի ձայնը:
Ապացուցված է, որ փափուկ քիմքի պարբերական ուժեղ տատանումներից առաջանում է նյարդաթելերի վնասում:
Այսպիսով, այն մարդիկ, ովքեր ունեն երբեմն հանդիպող սովորական խռմփոց, բարձր ռիսկի խմբում են, որ ժամանակի ընթացքում այն կվերածվի պաթոլոգիկ վիճակի՝ քնի ծանր շնչառական խնդրի՝ ինչպիսին քնի ապնոէն է, և այս դեպքում անխուսափելի կլինեն նյութափոխանակության խանգարումները, սիրտ-անոթային խնդիրները, և, իհարկե ավելի խաթարված քունը:  Արթնանում եք հոգնած և քնից չբավարարված
Քնի ընթացքում խռմփացնելու պարագայում տուժում է քունը և հատկապես քնի վերականգնող՝ խորը փուլը, և քրոնիկական դառնալու դեպքում սկսում են ի հայտ գալ նաև ցերեկային քնկոտություն, օրվա ընթացքում աշխատունակության անկում, խստորեն տուժում է կենսակերպը և անձի սոցիալական կյանքը:

Բուժումը
Ախտորոշումը կատարվում է ընտանիքի անդամների ներկայացրած նկարագրի հիման վրա:
Մասնագետի գլխավոր նպատակն է ախտորոշման և բուժման ընթացքում բաց չթողնել քնի ապնոէն: Սա կարելի է ախտորոշել օբյեկտիվ հետազոտությամբ միայն՝ պոլիսոմնոգրաֆիայով:
Խռմփոցի բուժման հիմնական եղանակը վիրահատականն է: Այս խնդրով զբաղվում են ԼՕՌ մասնագետները, սակայն ըստ միջազգային ուղեցույցների՝ յուրաքանչյուր պացիենտի մոտ նախ պետք է բացառվի քնի օբստրուկտիվ ապնոէի առկայությունը: Հակառակ դեպքում՝ վիրահատությունը կարող է արդյունավետ չլինել, իսկ երբեմն նաև հետվիրահատական բարդություններ առաջանան: 
Այսպիսով, շատ կարևոր է, որ խռմփոցն ունենա օբյեկտիվ ախտորոշում:
Բացի ստացիոնար հետազոտությունից՝ պոլիսոմնոգրաֆիայից, գոյություն ունեն նաև շարժական սարքեր, որոնք տան պայմաններում կիրառելով ևս հնարավոր է հասկանալ՝ կա՞ լուրջ խնդիր, թե՝ ոչ:                              Որպես վիրահատության այլընտրանք                                                                                                                                                                                                                                                                                                Պացիենտներ կան, ում դեպքում վիրահատությունը արդյունք չի տվել կամ խուսափում են վիրահատվել, և այս դեպքում կարիք կա դիմել այլընտրանքային միջոցների: Խոսքը տեղային դեղորայքային և այլ մեխանիկական լուծումների մասին է: Կան սփրեյներ՝ բերանի խոռոչում կիրառելու համար, որոնք թույլ չեն տալիս, որ քիմքը կախվի, կան հարմարանքներ, որոնք ուղղված են ստորին ծնոտն առաջ բերելուն՝ քնած ժամանակ: Այս կերպ բկանցքի լուսանցքի հատվածն ավելի լայնանում է և կախվելու հավանականությունը՝ նվազում: Սրանք արդյունավետ են հատկապես այն դեպքերում, երբ պացիենտն ունի խռմփոց, թեթև արտահայտված  ապնոէ և չի ցանկանում դիմել վիրահատության: Այս սարքավորումը բավական հասանելի է:

Բուժելով խռմփոցը՝ լուծել մի ողջ ընտանիքի խնդիր ☺
Հաճախ են դեպքերը, երբ խռմփացնողին իր խնդիրը բնավ չի անհանգստացնում, սակայն ընտանիքի բոլոր անդամների համար դա դառնում է իրական փորձություն: Ստացվում է, որ նույն ընտանիքում մի կողմից ունենում ենք քնի շնչառական խնդիր ունեցող, մյուս կողմից՝ քունը էապես խախտված և ձևավորվող անքնությամբ անդամներ: Եվ մենք այս խնդիրը լուծելով, կարող ենք օգնել միանգամից բոլորին:

Ու՞մ դիմել
Սկսենք նրանից, որ նախ պետք է դիմել որևէ մասնագետի, և կարևոր է, որ նա քաջատեղյակ լինի այս խնդրի լուծման համար կիրառվող բոլոր բուժական միջոցներին: Այս հարցին կարող են առնչվել շատ մասնագետներ՝ առաջնային օղակի բժիշկներ՝ թերապևտները, ընտանեկան բժիշկները, թոքաբանները, սրտաբանները, նյարդաբանները և, իհարկե, նեղ մասնագիտացված մոտեցում կարելի է գտնել այցելելով քնի մասնագետի: